Qaz sabiti

Qaz sabiti $\left(R\right)$ — fundamental fiziki sabit olub 1 mol ideal qazın hal tənliyinə daxildir: $p{V}_{\mu }=RT$. Burada $p-$ təzyiq, $V_{\mu }-$ $1\mathrm{m}\mathrm{o}\mathrm{l}$ qazın həcmi (molyar həcm), $T-$ mütləq temperatur, $R$ isə universal (molyar) qaz sabitidir.

Qaz sabiti ədədi qiymətcə maddə miqdarı 1 mol olan ideal qazın sabit təzyiqdə 1 K qızdıqda genişlənərkən gördüyü işə bərabərdir.

Qaz sabitinin BS-də ədədi qiyməti aşağıdaakı kimidir:

$R=8.3144598(48)\frac{C}{\mathrm{m}\mathrm{o}\mathrm{l}\mathrm{\cdot }\mathrm{K}}$.

Dairəvi mötərizələrdəki ədəd kəmiyyətin qiymətinin axırıncı rəqəmlərdəki standart xətasını göstərir.

Qaz sabiti ilə Boltsman sabiti arasında əlaqə

$R$ universal (molyar) qaz sabiti $k_{\mathrm{B}}$ (çox vaxt $k$ kimi işarə edilir) Boltsman sabiti ilə $N_{\mathrm{A}}$ Avoqadro sabitinin hasilinə bərabərdir:

$R=k{N}_{\mathrm{A}}.$

$R$ universal (molyar) qaz sabitinin maddənin $M$ molyar kütləsinə nisbətinə xüsusi qaz sabiti deyilir və $B$ kimi işarə edilir $([B]=\frac{\mathrm{C}}{\mathrm{k}\mathrm{q}\mathrm{\cdot }\mathrm{K}})$:

$B=\frac{R}{M}.$

Həmçinin bax

• Boltsman sabiti
• Avoqadro sabiti
• Maddə miqdarı
• Molyar kütlə